Derng cit iahKa Daioaan Zhad Seg - Zngf Sernghioong
給台灣漆色(台語現代詩2001/6/7 刊登於自由時報)
Lie itdeng sviuxkorng Daioaan bunhoax si zhosiok ee.
Inui lie siu kuex sox zap dafng ee Diongkog hoax kaoiok.
Lie itdeng afnnef sviu.
你一定想講(korng)台灣文化是粗俗的(ee)，
因為你受過數十冬的中國化教育，
你一定按呢想。
Mxkoiq, di goar ee gafndiofng,
Daioaan ee muie cit zhuxn tofde,
defngtaau ee muie cit ee sviemia,
muie cit zaang chiuxar, muie cit dex cioiqtaau,
lorng u goar segsai ee iubie.
不(m)過，在(di)我的眼中，
台灣的每一寸土地，頂面的每一個生命，
每一欉樹仔，甲每一塊石頭，
攏有我熟識的優美。
Lie sviuxkorng cixnliong ka lixiong, ka sngfdng.
Zautad liao doi laai zao hng-hng.
Mxkoiq, hiaf ee muie cit kefng zhux,
lorng u doax dioih goar ee chinlaang,
goar ee pengiuo, goar ee hviadi cymoe.
Goarn ee sym sioilieen,
paai kuy paai, laai phahpviax.
台灣這塊土地，
你嘛想講盡量給利用，給酸斷(sngfdng)，
糟蹋了道來走遠遠。
不過，彼(hiaf)的每一間厝，
攏有住著我的親人， 我的朋友，我的兄弟姐妹。阮的心相連，
排規排，來打拼。
Lie jixnuii Daioaan mxsi cit ee kokkaf.
Cit ee gynar, lie na booi bueq ka dorngzoix laang chi.
Diofngdoa booi chinchviu laang, si bueq laai koaix sviaflaang?
你認為台灣不是一個國家，
一的囝仔，你若沒要給當做人飼， 長大沒親像人，是要來怪甚人？
Qix Giogsafn derng zhoarn cit qao doa quix.
Laai Qwndefng ee haypof dah zhud cit paai ee qaixn.
Zhaan dionghngf, iaxchi-ar lai, ka suun-suun qvoax-qvoax.
Kab apeq korng kuie kux oe.
Kab gynar zoirdin tittooi cide.
Lie doi ue kafmsiu dioih yn ee sviemia lat.
去玉山頂喘一口大氣，
來墾丁的海埔踏出一排的腳印，
田中央，夜市阿內，給巡巡看看；
合(kab)阿伯講幾句話，
合(kab)囝仔七陀(tittooi)一下，
你道能感受著姻的生命力。
Daioaan suiaux lie qix ka zhatseg.
Iong lie ee chiuo, iong lie ee diehui, koiq iong lie ee sym.
Itdit kaux u cit kafng, siekuex lorng zhad dioih lie kahix ee sekzhae.
Hitsii, lie doi cincviax exdaxng iofngiuo y.
Daioaan si lie ee.
台灣需要你去給漆色，
用你的手，用你的智慧，擱用你的心。
一直到有一天，四界攏漆著你甲意的色彩，
彼時，你道(doi)真正能當擁有依，
台灣是你的。