Dngr qix zngqaf doxkar                Daan Suixsef, 2003/03/21

    Kueanii zeeng svaf kafng, goar kab goarn siensvy zhoa goarn ee kawar Siauxkoay dngr qix zngqaf-Dailaam koan Auxpiaq hiofng kueanii.

    Kinnii goarn dakvoaf u sefng chviax laang laai pviarsaux, sofie goar kandaf iong nng kafng ee sikafn doi ciofng zaoqaf kab ciaqpng-tviaf pviarsaux kaq zengqix-liuliw.

    Svaf-zap hid kafng, goar kab padlaang kaxngqoarn boieeng deq zwnpi paepaix ee pngxzhaix. Paix hoir ciaqpar yau, goar dngr qix zngqaf ee zekjim zhaputdoy lorng oanseeng laq.

    Uix Zhef-id kaux Zhef-go, sikafn nafchviu kw deq pee. Muie cit kafng goar lorng eeng-loiloy, mxzay bueq zhoxng sviaq ciaq hoir. Zaq dngr qix ee go doa purn kax laang oe hwnzhae ee zheq kab Ngg Sikiexn lauxsw ee Daigie Chioiroe Soafnzhuix lorng liam oaan aq. Zhue booi daixcix hoir zoix, uxkaux boiliaau.

    Goarn lauxkofng cioy goar qiaa tihbea qix tittooi. Goar cit sviaf doi dahexng. Goarn nng laang qiaa nng daai tihbea zaq nng liap kamar qafn goarn Siauxkoay doi zhutmngg aq. Kinafjit hioxng dafng, binafzaix hioxng say, auxjit orng laam, doa auxjit orng pag. Muie cit jit lorng kviaa boikang ee loxsvoax.

    Goarn kaux muie cit ee zngf, lorng ue qix zhue yn ee kokhau. Jibqix hauxhngg laixbin siekuex kviaa-kviaa. Qvoax cid kefng haghau u kuie pafn; muie pafn u kuyee hagsefng. Yn ee hauxhngg u sviafmih degseg.

    Goar qvoax citmar zngqaf ee haghau phofphiexn lorng qie kaq cyn suie. Hauxhngg qaq doa. Ma u cyn zue bunhoax-sexng ee sietsy. Dochi ee haghau inui hagsefng cyn zue, sietpi doa poxhun lorng sefng qoylu sidiong-sexng, qaq cioir zuoix dioih bunhoax kab gexsut ee buxndee, sidzai cyn qoysioiq!

    Zuxcioong sidsy kao-nii-id-koaxn kaoiok kaykeg yau, goar muie cit kafng lorng chviu kanlok se-laai-se-qix, uxkaux boieeng. Kueanii hid kuie kafng eeng kaq mxzay bueq afnzvoar ciaq hoir. Citmar sviu qylaai, sidzai cyn hiafngsiu, doi chinchviu doxkar kaxngqoarn.

    Sofie, laang na u daixcix tafng zoix ee sii doi aix jixncyn zoix; aq na booi daixcix tafng zoix ee sii, doi aix exhiao hiafngsiu hid ciorng zhengeeng, afnnef jinsefng ciaq u iesux.